ශ්‍රී ලංකා පොලිසිය මගින් නුදුරේදීම ස්ථාපිත කිරීමට නියමිත ‘නීති විරෝධී වත්කම් හා බුද්ධිමය දේපළ වැරදි සම්බන්ධ නව විමර්ශන ඒකකය’

අපරාධකරුවන් විසින් නීතිවිරෝධී ලෙස උපයාගෙන ඇති වත්කම් පිළිබඳව විමර්ශනය කිරීම සඳහා ශ්‍රී ලංකා පොලිසිය විසින් කොළඹ 01, චැතම් වීදියේ සෙන්ට්‍රල් පොයින්ට් හි ‘නීති විරෝධී වත්කම් හා බුද්ධිමය දේපළ වැරදි සම්බන්ධ නව විමර්ශන ඒකකය’ පිහිටුවීමට නියමිතය.

මෙම නව විමර්ශන ඒකකය ජ්‍යෙෂ්ඨ පොලිස් අධිකාරී / පොලිස් අධිකාරීවරයකුගේ විෂය පථය යටතේ උප ඒකක 07 ක් තුල ක්‍රියාත්මක වේ.

මෙම ඒකකය යටතේ වන උප ඒකක 07 හි රාජකාරි  පහත දැක්වෙන පරිදි සිදු කරගෙන යාමට සැලසුම් කර ඇත

විමර්ශන ඒකක අංක 01

•    රිමාන්ඩ් සැකකරුවන් හා බන්ධනාගාර ගත කර ඇති සිරකරුවන් ඇතුළුව අපරාධකරුවන් විසින් නීති විරෝධීව ජංගම දුරකථන භාවිතා කරමින් සිදුකරනු ලබන අපරාධ සම්බන්ධ විශ්ලේෂණ හා විමර්ශන කටයුතු සිදුකිරීම.

විමර්ශන ඒකක අංක 02

•    සංවිධානාත්මක අපරාධකරුවන් විසින් භාවිතා කරනු ලබන බැංකු ගිණුම්වලට අදාල විමර්ශන කටයුතු, ගිණුම් පරික්ෂාව හා ගිණුම් ක්‍රියා විරහිත කිරීම හා රාජසන්තක කිරීම.

•    මත්ද්‍රව්‍ය නාශක  කාර්යංශය සහ ප්‍රාදේශීය පොලිස් ස්ථාන මගින් සිදුකරන විමර්ශන වලදී අනාවරණය වන මත්ද්‍රව්‍ය ජාවාරම් කරුවන්ගේ බැංකු ගිණුම්, අත්පත් කරගෙන ඇති දේපල හා භාරයට ගනු ලබන මුදල් හා වත්කම් පිළිබඳව තොරතුරු රැස් කිරීම හා එම දේපල මුදල් විශුද්ධිකරණ පනත යටතේ ක්‍රියාවිරහිත කිරීම හා රාජසන්තක කිරීම සඳහා අවශ්‍ය නෛතික කටයුතු සිදු කිරීම.

විමර්ශන ඒකක අංක 03

•    ත්‍රස්තවාදය වැළැක්වීමේ තාවකාලික විධිවිධාන පනත යටතේ තහනම් කල සංවිධානයක හෝ මුදල් විශුද්ධිකරණය යටතේ උපයාගන්නා ලද හෝ විෂ වර්ග, අබිං හා අන්තරාදායක ඖෂධ ආඥා පනත යටතේ ජාවාරම් සඳහා යොදා ගන්නා ලද වාහන, දේපල ඇතුළු නිශ්චල හෝ චංචල වත්කම් රාජසන්තක කිරීම සඳහා අවශ්‍ය නෛතික සහ කාර්යය පටිපාටික පියවර ගැනීම හෝ උපදෙස් සහ සහාය ලබා දීම.

•    ත්‍රස්ත මර්ධන හා විමර්ශන කොට්ඨාශය, මත්ද්‍රව්‍ය නාශක කාර්යංශය, අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන ඒකකය මගින් සිදු කරන විමර්ශන සහ ප්‍රාදේශීය පොලිස් ස්ථාන හා ඒකක මගින් සිදු කරන විමර්ශන වලට අදාලව ඉහත පරිදි රාජසන්තක කිරීම සඳහා කටයුතු කිරීමේදී අවශ්‍ය නෛතික සහ කාර්ය පටිපාටික පියවර ගැනීම හෝ උපදෙස් සහ සහාය ලබා දීම.

විමර්ශන ඒකක අංක 04

•    බලෙන් ලබා ගැනීම් ආදිය සඳහා අපරාධකරුවන් විසින් යොදාගනු ලබන ඊසී කෑෂ් (Easy Cash), එම් කෑෂ් (M Cash) ආදී ජංගම මුදල් ගනුදෙනු කිරීමේ ක්‍රම සඳහා භාවිතා කරනු ලබන සියලුම ජංගම දුරකතන අංකයන් විශ්ලේෂණය කටයුතු සිදු කිරීම, එම දුරකථන ජාලයන් සකස් කිරීම සහ අදාල විමර්ෂණ කටයුතු සඳහා ප්‍රාදේශීය පොලිස් විමර්ෂන අංශ සහ අනෙකුත් විමර්ෂන ඒකක වෙත සහාය ලබා දීම.

විමර්ශන ඒකක අංක 05

•    වරාය, ගුවන්තොටුපලවල් මගින් සහ නීති විරෝධී ක්‍රම මගින් විදේශ ගතවීමේදී අත්අඩංගුවට ගනු ලබන නීති විරෝධී සංක්‍රමණිකයන් ඇතුළු ඕනෑම තැනැත්තෙකු ආගමික හා විගාමික පනත උල්ලංඝණය කරමින් සිදුකරනු ලබන අපරාධ විමර්ෂන වලට අදාල විදේශ ගමන් බලපත්‍ර, ව්‍යාජ ලේඛණ සම්බන්ධ විමර්ශනය සඳහා ප්‍රාදේශීය පොලිස් විමර්ශන අංශ සහ අනෙකුත් විමර්ශන ඒකක වෙත සහාය ලබාදීම.

විමර්ශන ඒකක අංක 06

ප්‍රාදේශීය පොලිස් විමර්ශන අංශ සහ අනෙකුත් විමර්ශන ඒකක වෙත.

•    නීති විරෝධී ලෙස ස්වයංක්‍රීය ටෙලර් යන්ත්‍ර (ATM) ඇතුළු ගෙවීම් උපක්‍රම (Credit and Debit Cards) සම්බන්ධ වැරදි වලට අදාල විමර්ශන සඳහා.

•    නීති විරෝධී ලෙස පරිඝණක දත්ත සොරා ගැනීම සිදු කරනු ලබන අපරාධ සම්බන්ධ විමර්ශන වලදී තාක්ෂණ සහය සහ උපදෙස් ලබා දීම.

විමර්ශන ඒකක අංක 07

•    විදේශීය සමාගම් හෝ විදේශීය සමාගමක නියෝජිත සමාගම් හෝ ඇටෝර්නි බලපත්‍රයක් මගින් යම් විදේශීය සමාගමක හෝ නියෝජිත ආයතනයක නෛතික බලය පැවරූ තැනැත්තෙකු විසින් එවැනි සමාගමක බුද්ධිමය දේපල සම්බන්ධ වැරදි පිළිබඳ විමර්ශනය කිරීමේදී එම බුද්ධිමය දේපල පිළිබඳව තොරතුරු යම් විදේශීය ආයතනයකින් ලබා ගැනීමට තිබෙන අවස්ථාවලදී එම විමර්ශන මෙම ඒකකය මගින් සිදුකිරීම.

•    ප්‍රාදේශීය පොලිස් විමර්ශන ඒකක මගින් හෝ විශේෂ විමර්ශන ඒකක මගින් කරනු ලබන ඉහත විමර්ශන ඒකක අංක 07හි විස්තර කර ඇති ආකාරයේ විමර්ශන නොපමාව මෙම ඒකකයට යොමුකිරීම සිදුකරයි.

ඉහත ක්‍රමවේදයට මෙම ඒකකය මගින් ඉදිරි විමර්ශන කටයුතු සිදුකිරීමට බලාපොරොත්තු වේ