වැසි සහිත කාලගුණයක් අපේක්ෂා කරන බව
කාලගුණ විද්‍යා දෙපාර්තමේන්තුව පවසයි.
මාර්තු 16, 2023
කාලගුණ විද්‍යා දෙපාර්තමේන්තුව නිකුත් කළ නවතම කාලගුණ අනාවැකියට අනුව දිවයිනේ බොහෝ ප්‍රදේශවල සවස් කාලයේ ගිගුරුම් සහිත වැසි සහිත තත්ත්වයක් අපේක්ෂා කරයි.
අද (මාර්තු 16) උදෑසන නිකුත් කරන ලද කාලගුණ නිවේදනයේ දැක්වෙන්නේ බස්නාහිර, සබරගමුව, උතුරු-මැද, වයඹ සහ ඌව පළාත්වලත් ගාල්ල, මාතර, මහනුවර, නුවරඑළිය සහ මන්නාරම දිස්ත්‍රික්කවලත් තැනින් තැන දහවල් හෝ රාත්‍රී කාලවල වැසි හෝ ගිගුරුම් සහිත වැසි ඇති වන බවයි.
තවද සබරගමුව පළාතේ සහ කළුතර, ගාල්ල සහ නුවරඑළිය යන දිස්ත්‍රික්කවල ඇතැම් ස්ථානවලට මිලිමීටර් 75ක පමණ තරමක තද වර්ෂාපතනයක් ඇති විය හැකි බව එහි වැඩිදුරටත් සඳහන් වේ.
නැගෙනහිර පළාතේ වෙරළබඩ ප්‍රදේශවල ද වැසි ස්වල්පයක් ඇති විය හැක.
ගිගුරුම් සහිත වැසි ඇති වන විට එම ප්‍රදේශවල තාවකාලික තද සුළං සහ අකුණු මඟින් සිදුවන අනතුරු අවම කර ගැනීමට ප්‍රමාණවත් පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.