නව ගුවන් හමුදාපතිවරයා නියෝජ්‍ය ආරක්‍ෂක ඇමති හමුවෙයි
පෙබරවාරි 04, 2025අභිනවයෙන් පත් වූ ගුවන් හමුදාපති එයාර් මාර්ෂල් බන්දු එදිරිසිංහ පසුගිය සඳුදා (පෙබ 03) නියෝජ්‍ය ආරක්‍ෂක අමාත්‍ය මේජර් ජෙනරල් අරුණ ජයසේකර (විශ්‍රාමික) කොළඹ පිහිටි ඔහුගේ කාර්යාලයේදී හමුවිය.
එයාර් මාර්ෂල් එදිරිසිංහ ගුවන් හමුදාපති ධූරයට පත්වීමෙන් පසු නියෝජ්‍ය ආරක්‍ෂක අමාත්‍යවරයා සමඟ සිදුකල පළමු නිළ හමුව මෙය වේ.
ගුවන් හමුදාපතිවරයා ලෙස කටයුතු කිරීමට අවස්ථාව ලැබීම පිළිබඳව තමා නිහතමානී ලෙස ආඩම්බර වන බවත්, ශ්‍රී ලංකා ගුවන් හමුදාවේ මෙහෙයුම් හැකියාවන් සහ උපාය මාර්ගික සූදානම ශක්තිමත් කිරීමට තමා කැපවීමෙන් කටයුතු කරන බවත්, එයාර් මාර්ෂල් එදිරිසිංහ මෙම හමුවේදී අවධාරණය කළේය. ජාතික ආරක්‍ෂාව, ආපදා ප්‍රතිචාර සහ තාක්‍ෂණික දියුණුව සඳහා ගුවන් හමුදාවේ කාර්යභාරය වැඩි දියුණු කිරීම සඳහා වූ ඔහුගේ දැක්ම ද ගුවන් හමුදාපතිවරයා මෙහිදී ඉස්මතු කරන ලදී.
මේජර් ජෙනරල් ජයසේකර (විශ්‍රාමික) නව ගුවන් හමුදාපතිවරයා වෙත සිය සුභාශිංසන පළ කල අතර, ජාතියේ ස්වෛරීභාවය ආරක්‍ෂා කිරීම සඳහා ගුවන් හමුදාවේ අඛණ්ඩ දායකත්වය අගය කළේය. ත්‍රිවිධ හමුදාවන් අතර සහයෝගීතාවයේ වැදගත්කම මෙහිදී අවධාරණය කල නියෝජ්‍ය ආරක්‍ෂක අමාත්‍යවරයා ගුවන් හමුදාවේ අරමුණු ඉදිරියට ගෙන යාම සඳහා අමාත්‍යාංශයේ සහාය සහතික කළේය.
ආරක්‍ෂක අමාත්‍යාංශය සහ ශ්‍රී ලංකා ගුවන් හමුදාව අතර ශක්තිමත් හවුල්කාරිත්වය සංකේතවත් කරමින් සමරු තිළිණ හුවමාරුවක් මෙම හමුවේ දී සිදුවිය.
