ඉන්දියානු සාගරයේ ප්‍රංශ ඒකාබද්ධ හමුදා අණදෙන නිලධාරි
ආරක්‍ෂක ලේකම්වරයා හමුවෙයි
මාර්තු 20, 2025
ඉන්දියානු සාගරයේ ස්ථාපිත ප්‍රංශ ඒකාබද්ධ හමුදා ඛණ්ඩ අණදෙන නිලධාරි රියර් අද්මිරාල් Hugues Laine පසුගියදා (මාර්තු 19) දින ශ්‍රී ජයවර්ධනපුර කෝට්ටේ පිහිටි ආරක්‍ෂක අමාත්‍යාංශයේදී ආරක්‍ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) හමුවිය.
ශ්‍රී ලංකාවේ ප්‍රංශ දූත මණ්ඩල නියෝජ්‍ය ප්‍රධානී Marie - Noelle Duris මහත්මිය, ඉන්දියාවේ නවදිල්ලි හි පිහිටි ප්‍රංශ තානාපති කාර්යාලයේ ශ්‍රී ලංකාව හා සම්බන්ධ කටයුතු අධීක්‍ෂක සහ නාවික හමුදා උපදේශක කමාන්ඩර් Dang Khoa Bui මෙන්ම, කොළඹ වරාය වෙත ලඟා වූ ප්‍රංශ නාවික හමුදාවට අයත් 'Provence' යුද නෞකාවේ අණදෙන නිලධාරි කපිතාන් Lionel Siegfried ඇතුළු පිරිසක් මෙම ප්‍රංශ දූත පිරිසට ඇතුළත් වුහ. ආරක්‍ෂක ලේකම්වරයා විසින් ආරක්‍ෂක අමාත්‍යාංශය වෙත පැමිණි ප්‍රංශ නියෝජිත පිරිස ඉතා උණුසුම් අයුරින් පිළිගනු ලැබීය.
මෙම හමුව අතරතුර පැවති සාකච්ඡාවලදී, ඉන්දියානු සාගර කලාපයේ ද්විපාර්ශ්වික ආරක්‍ෂක සහයෝගීතාව, කලාපීය සමුද්‍රීය ආරක්‍ෂාව සහ අන්‍යොන්‍ය වශයෙන් පවතින අවශ්‍යතාවන් පෝෂණය කිරීම ආදී කරුණු කිහිපයක් සම්බන්ධයෙන් දෙපාර්ශ්වයේම විශේෂ අවධානය යොමුවිය. එමෙන්ම, ආරක්‍ෂක ලේකම්වරයා සහ රියර් අද්මිරාල් Laine විසින් පොදු ආරක්‍ෂක අභියෝගයන්ට සාර්ථකව මුහුණ දීම සඳහා දෙරට අතර සහයෝගීතාව ශක්තිමත් කිරීම පිළිබඳව අදහස් හුවමාරු කර ගත්හ.
ශ්‍රී ලංකාව සහ ප්‍රංශය අතර දිගුකාලීන ආරක්‍ෂක හවුල්කාරිත්වය උසස් කොට දක්වමින් අගය කල ආරක්‍ෂක ලේකම්වරයා, කලාපීය ස්ථාවරත්වය ප්‍රවර්ධනය කිරීම සඳහා දෙරට අතර අඛණ්ඩ අදහස් හුවමාරු කරගැනීමේ සහ ඒකාබද්ධ මුලපිරීම් සිදුකිරීමේ වැදගත්කම ඉස්මතු කළේය.
භූගෝලීය වශයෙන් ශ්‍රී ලංකාවේ පිහිටීමෙහි උපායමාර්ගික වැදගත්කම පිලිබඳ කරුණු ඉදිරිපත් කල රියර් අද්මිරාල් Laine, සමුද්‍රීය ක්ෂේත්‍ර සම්බන්ධයෙන් දැනුවත් කිරීම, මානුෂීය ආධාර සහ සමුද්‍රීය ආපදා ප්‍රතිචාර වැනි ක්ෂේත්‍ර ඔස්සේ දෙරට අතර ගැඹුරු සහයෝගීතාවයක් ඇතිකර ගැනීමට ඇති හැකියාව අවධාරණය කළේය.
සාකච්ඡාවෙන් අනතුරුව, ප්‍රංශ නියෝජිතයින් විසින් ඔවුන් වෙත පිරිනමන ලද උණුසුම් පිළිගැනීම් හා ආගන්තුක සත්කාරය වෙනුවෙන් ආරක්‍ෂක අමාත්‍යාංශය වෙත සිය කෘතඥතාව පළ කළහ. මෙම අවස්ථාව සනිටුහන් කිරීම සඳහා සිහිවටන හුවමාරුවක් ද සිදු කරන ලදී.
ප්‍රංශ දූත පිරිස සමඟ පැවති මෙම සාකච්ඡාවට ආරක්‍ෂක අමාත්‍යාංශයේ හමුදා සම්බන්ධතා නිලධාරි ද එක්ව සිටියේය.
