නාවික හමුදාවෙන් කලපු ප්‍රදේශය ආවරණය වන පරිදි කඩොලාන පැළ රෝපණ වැඩසටහනක්
මැයි 26, 2022ශ්‍රී ලංකා නාවික හමුදාව විසින් මන්නාරම සහ ආරුගම්බේ කලපු ප්‍රදේශවල කඩොලාන රෝපණ වැඩසටහනක් දියත් කරන ලද අතර එහිදී නාවික හමුදා සාමාජිකයින් විසින් අවස්ථා දෙකකදී කඩොලාන පැළ විශාල ප්‍රමාණයක් සිටුවා ඇත.
ඒ අනුව, මන්නාරම වෙරළබඩ ප්‍රදේශයේ කඩොලාන පැළ 1200ක් ද, ආරුගම්බේ කලපුවේ තවත් කඩොලාන පැළ 250ක් ද මෑතකදී (මැයි 20 සහ 21) සිටුවන ලදී.
නාවික හමුදාපති, වයිස් අද්මිරාල් නිශාන්ත උළුගේතැන්න මහතාගේ උපදෙස් මත සිදු කෙරුණු මෙම කඩොලාන රෝපණ වැඩසටහන සඳහා උතුරු මැද සහ ගිනිකොන නාවික විධානයන්හි නාවික හමුදා සාමාජිකයින් සහභාගී වූ බව නාවික හමුදා මාධ්‍ය සඳහන් කරයි.
තවද, මන්ඩතිව් දූපතේ සහ යාපනයේ පොන්නලෙයි කලපුවේ වෙරළබඩ ප්‍රදේශවලද කඩොලාන පැළ පසුගියදා (මැයි 20) සිටුවා ඇත. කඩොලාන සංරක්ෂණයේ තවත් පියවරක් ලෙස උතුරු නාවික විධානය විසින් මණ්ඩයිතිව් දූපතේ සහ පොන්නලෙයි කලපුවේ වෙරළබඩ ප්‍රදේශ ආවරණය වන පරිදි කඩොලාන පැළ 3800 ක් රෝපණය කළ බව එහි සඳහන් වේ.
කඩොලාන යනු සමුද්‍ර පරිසර පද්ධතියේ වැදගත් කොටසක් වන අතර මානව ක්‍රියාකාරකම් හේතුවෙන් මෙම පරිසර පද්ධති වඳවීයාමේ තර්ජනයකට මුහුණ දී ඇත. ශ්‍රී ලංකා නාවික හමුදාව සිය සමාජ වගකීම් වැඩසටහනේ කොටසක් ලෙස කඩොලාන සංරක්ෂණ ව්‍යාපෘතිය දියත් කර ඇති අතර මේ වන විට මෙම ව්‍යාපෘතිය මඟින් දිවයිනේ වෙරළබඩ ප්‍රදේශවල කඩොලාන පැළ දහස් ගණනක් සිටුවා ඇත.
