உயிர்த்த ஞாயிறு தாக்குதலுடன் தொடர்புடைய முன்னாள் அமைச்சர் ரிஷாத்தின் சகோதரர் கைது

முன்னாள் அமைச்சர் ரிஷாத் பதியுதீனின் சகோதரர் ரியாஜ் பதியுதீன் கைது செய்யப்பட்டுள்ளார். உயிர்த்த ஞாயிறு தாக்குதலுடன் தொடர்புபட்டிருந்ததன் பேரில் குற்றப் புலனாய்வுப் பிரிவினரால் இவர் புத்தளத்தில் வைத்து கைது செய்யப்பட்டதாக அரசாங்க தகவல் திணைக்களத்தில் இன்றைய தினம் இடம்பெற்ற ஊடகவியலாளர் மாநாட்டில் பொலிஸ் அத்தியட்சகர் ஜாலிய செனரத்ன தெரிவித்தார்.

உயிர்த்த ஞாயிறு தாக்குதலின் தற்கொலைதாரி ஒருவருடன் ரியாஜ் பதியுதீன் தொடர்புபட்டிருந்ததாக தற்பொழுது முன்னெடுக்கப்பட்டுவரும் விசாரணையின் மூலம் தெரியவந்துள்ளதாக பொலிஸ் ஊடக பேச்சாளர் தெரிவித்துள்ளார்.

தாக்குதல் இடம்பெறுவதற்கு முன்னர் புகழ்பெற்ற ஹோட்டலில் தற்கொலை குண்டுதாரிகளில் ஒருவரை ரியாஜ் பதியுதீன் சந்தித்திருந்ததாக விசாரணை மூலம் தெரிய வந்துள்ளதாக அவர் தெரிவித்துள்ளார்.

ஊடகவியலாளர்களின் கேள்விகளுக்கு பதில் அளித்த பொலிஸ் அத்தியட்சகர், தடுப்புக் காவலில் உள்ள சந்தேக நபர்களிடையே வழக்கறிஞர் ஒருவர் அடங்குவதாகவும், அவர் தாக்குதலில் ஈடுபட்ட இரண்டு தற்கொலைதாரிகளுடன் நெருங்கிய தொடர்பு கொண்டிருந்தவர் எனவும் மேற்கூறிய நிறுவனங்களில் பல்வேறு பதவி வகித்துவந்த நிலையில் தற்கொலைதாரிகளுடன் பல பேச்சுவார்த்தைகளை நடத்தியுள்ளார் எனவும் தெரிவித்தார்.